प्रियंकाको सिउँदोमा सिन्दुर, ‘तम्रा नी हाम्रा बाहेक को छ र’ भन्दै दीपकसँग साटिन् प्रेम

भैसेपाटीबाट थोरै ओरालो झरेपछि धान रोप्न तयार भएका किसान र उनीहरुको पानी नपरेर सुख्खा रहेको खेत देखिन्छ । त्यही खेतको कुनै कुनामा बसेर दुई चर्चित अनुहार मायाप्रेम साट्दैछन् ।

छेउमै गीत घन्किएको छ । गीतले भन्दैछ-‘देखन चम्पा सुन न चम्पा, हाम्रा त तम्रा बाहेक को छ र ? तम्रा नी हाम्रा बाहेक को छ र ?’

दुई चिनिएका अनुहार थिए, हाँस्य कलाकार दीपकराज गिरी र नायिका प्रियंका कार्की । कुरा वुझ्दै जाँदा थाहा भयो, चलचित्र ‘छक्का पञ्जा’मा समावेश एक सुदुरपश्चिमेली भाकाको गीतको छायांकन भैरहेको रहेछ ।
खेतमा काम गर्दै गरेका आफ्ना श्रीमान्लाई श्रीमतिले खाजा लगेपछि, डिलमा बसेर दुबैले माया प्रेम साट्दै गरेको दृश्य तयार पारेका थिए, कोरियोग्राफर कविराज गहतराजले । नायिका कार्कीको सिउँदोमा सिन्दुर थियो भने दीपक कृषकको भेषमा गीतमा देखिएका थिए ।

अनलाइनखबर टोली पुग्नु अघि दीपकले खेत जोत्दै गरेको दृश्यमा अभिनय गरेका रहेछन् । ‘पूर्व पश्चिम रेल’ गीतले युटुबमा राम्रो प्रतिक्रिया पाउँदै गर्दा चलचित्रमा समावेश दोश्रो गीतको छायांकन भैरहेको थियो ।
नेपाली मौलिक कथालाई टपक्क टिपेर दीपकराजले चलचित्र निर्माण गर्दै आएका छन् ।

कविराजको कोरियोग्राफी भएकाले निर्देशक दीपाश्री निरौला फुर्सदिलो नै देखिइन् । दीपाश्री चलचित्रलाई लिएर उत्साहित थिइन् । दीपाको छायांकनस्थलमा खासै काम नभएपनि उनी दीपकको पहिरनदेखि नायिकाको स्टाइलमा ध्यान दिन्थिन् ।

‘पूर्व पश्चिम रेल’ गीतमा दीपकराज गिरी, दीपाश्री निरौला, जितु नेपाल, केदार घिमिरे, बर्षा राउत, नम्रता सापकोटा देखिएपनि यो गीतमा भने दीपक र प्रियंका मात्र देखिनेछन् । भदौ २४ गतेबाट रिलिज हुने यो चलचित्र अहिले प्रतिक्षामा छ ।

खेत जोतिसकेपछि दीपक र प्रियंका खेत रोप्न पुगे । कोरियोग्राफर कविराज गहतराले जोनीजिप लगाएर खेतको दृश्य कैद गरे । दीपक बाउँसे गर्न तम्सिए भने प्रियंका रोपारसँग मिलेर खेत रोप्न थालिन् ।